نوبانيز- عمان

03-01-2019

من يومين قولنالكو ظبوهن لقشاطات الستلايت، أبيش ثلجة، اليوم بنحب نحكيلكو جهزوهن وجهزو العدس والعوامة والمناقيش والكازات وصوبة الفوجيكا، لأنه وعلى ذمة الراوي موقع طقس العرب اللي كلمته ما بتصير ثنتين وشكلين ما بحكي في ثلج على الطريق.

يعني مش من عنّا الكلام ولا من جروب جارات الحارة للتنبؤات الجوية، ولا من عند صفحة الراصد الجوي أبو ثلجة، وبقولك كمان وعلى ذمة الراوي "طقس العرب" إنه مع ساعات ليلة الأحد وفجر الاثنين رح تكون الظروف مهيأة لتساقط زخات من الثلج فوق الجبال الشاهقة (جبال عجلون وجرش العالية وممكن جبال الجنوب العالية).

شعب الأردن العظيم اذا حابين تشوفو الثلج ما الكو الا تلمّو غراضاتكو وعدتكو وبوجهكو على عجلون وجرش وجبال الجنوب، منه بتشوفو الثلج ومنه بتعلقو هناك وبتكسبولكو عطلة.

 

ارجعو طولو قشّاطات الستلايت!