نوبانيز- عمّان

05-01-2019

مين قال 2019 مش حتيجي بأخبار حلوة؟ هي دولة الرئيس عمر الرزاز طلع علينا على برنامج نبض البلد بتصريح رائع، تصريح خرافي، تصريح والله أنا قاعد ببكي وأنا قاعد بكتبه، الرزاز قال "مفش ضرايب جديدة ب2019"!

يعني أي نعم هو الحكومة طلعت علينا القديم والجديد بقانون ضريبة الدخل، وأي نعم رفعت أسعار كل إشي السنة الماضية وشالت دعم الخبز وغيره وغيره، بس خلص هيك الحمد لله 2019 عالأقل الأسعار حتثبت... هو الصراحة لا مش حتثبت، الرزاز بنفس الحوار قال إنه الأسعار لو ارتفعت هاي السنة هاد مش من الحكومة، الموضوع عرض وطلب واحنا ملناش دخل، مش كل إشي تيجوا تحطوه براس الحكومة، يعني والله اللي فينا مكفينا!

بس برضه بدناش نقلل من الإنجاز! الحمدلله مفش ضرايب جديدة السنة هاي وحتكون سنة لافلي لافلي، هو تقريباً مفش ضرايب جديدة لإنه مضلش نوع ضريبة ما حطوه.. يا رجل إحنا عنا بالأردن ضريبة عالضريبة! 

 

سماح بـ2019