نوبانيز- عمان

13-01-2019

هالمرة يا إخوان  الارصاد الجوية حلفت يمين عظيم أنه في ثلج، وقالت بالحرف الواحد والله رح يجي ثلج بس فوق المرتفعات الجبلية، يعني مش مثل الثلجات  اللي خبركو بيهن، اللي تمسكو فيهن الكريكات وقشاطات الستالايت وتضربولكو يومين عطلة جنب الصوبة، لأنه زي ما أنتو عارفين البلد مش كلها جبال شاهقة وأنتو شو اللي مخليكو تتشعبطو وتطلعو فوق المرتفعات تاتشوفوا الثلج!

وبتقول الارصاد كمان أنه المملكة رح  تتعرض لجبهة هوائية باردة، ورح تنشمطو ويكون الجو سميطة وقحيطة، وتاكلو بردات مرتبات فنزلّو الفروات واتجهزوا لتلبسو الخزانة وتقرمزوا حولين الصوبة ومش بعيد تحضنوها وتنشأ بيناتكم علاقة حب لا تنتهي، وتضربو عدس ومناقيش وخبز مقحمش وشوية عوامة على شوية كرابيج حلب!

اما بالنسبة لتساقط الامطار فمن المحتمل أن تكون الامطار غزيرة على فترات ومصحوبة بالرعد وتساقط زخات من البرد في بعض المناطق مما يؤدي إلى تشكل السيول، يعني من هسّع بنخبركو أنه رح توصلكم مسج من 911 وتحكيلكم لسلامتكم ابتعدوا عن السيول فأنتو انتبهو وابتعدو!

الأرصاد حلفت أنه في ثلج!