نوبانيز- عمان

13-01-2019

الحمدلله وألف شكر الك يا رب أنه الشاشات الجديدة بالمجلس ما صارلها ايشي وأنه الكراسي بعدها صامدة بمطارحها ووضعها عال العال بسبب المشكلة اللي صارت بمجلس النواب اليوم.

وما تقلقو الهوشة الخلافية من أجل المصلحة العليا للعامل وحقوقه، ما أسفرت عن أي اصابات لا مادية ولا بشرية لأنه الفزيّعة لحقوا الموقف على آخر لحظة، والقصة انتهت على شوية ملاسنة عن بعد بين النائب محمد البرايسة وخليل عطية.

طبعا التفاصيل حسب ما وردتنا أنه النائب خليل عطية طالب زملاءه بالهدوء، عقب ملاسنات بين نواب، على خلفية مادة في قانون العمل، راح البرايسة قاطعوا، وهون عصب عطية وقاللوا بالحرف الواحد "انقلع"، سمع البرايسة هالكلمة من هون وقبعت معاه من هناك وقام يركض باتجاه عطية ولولا النواب الفزيّعة كان قلبت بيناتهم ميمعة وبدل ما تكون مباطحة فكرية كان قلبت مباطحة بالأيدي!

المهم ربكو سلّم المجلس الجديد وربنا جبر هالمرة!  

 

 

بالفيديو: الشاشات الجداد لسه بخير برغم الطوشة!