نوبانيز- عمان

14-01-2019

هاتو البشارة يا مهندسين يا مجموعة مسخمين بهالوطن، نقابتكو  بتقول وبتطمنكو وبتحكيلكو خذو نفس عميق وحطو ببطنكو بطيخة صيفي- مع انه مش موسمه- لأنها حلفت يمين وقالت مش رافعين، يعني مش رح ترفع لا أقساط التقاعد ولا سن التقاعد وكل شي باقي على ما هو، وبتطمنكو انها هي حاسة معكو.

وبتحكي نقابة المهندسين أنه أكثر من 4 آلاف مهندس مشحّر معثّر كانوا مش قادرين يسددو أقساطهم التقاعدية لصندوق التقاعد، راحت النقابة عملت منيحة معهم وأعطتهم أوفر أحسن من أوفر راس السنة تبع 7 علب فول بدينار، وقالتلهم يلا نقسطلكو القديم والجديد بأقساط ميسّرة وعلى قدكو، وهالـ 4 آلاف مشحّر بلشّو بإجراءت التقسيط!

بس تخيلو 4 آلاف مهندس ما كانوا قادرين يدفعوا اقساطهم ويمكن في غيرهم آلافات ما قدرو يستفيدو من الأوفر، وديتو "المهندسين" فين يا حازم بصوت خالد زكي بفيلم طباخ الريّس!!

 

نقابة المهندسين: مش رافعين!