نوبانيز- عمّان

14-01-2019

ضمن مشروع "كاميرا سير لكل مواطن" الذي تنفذه أمانة عمان بالتعاون مع إدارة السير المركزية، يوم الأحد الجاي حتشغل 15 كاميرا جديدة لينضموا للمليون كاميرا كاميرا اللي أساساً موجودين بعمان!

بس الشهادة لله عشان ما يزهقونا مشكلينهم هاي المرة 12 رادار ثابت و3 كاميرات على الإشارات الضوئية! الأمانة طلعت حكت إنه تجهيزات الكاميرات تمام، دهنوا المسارب وحطوا لوحات السرعة مراقبة وتأكدوا إنه الفلاش شغال عشان الصورة تكون حلوة بس ضايل على المواطن يحكي جميد وهو بتصور!

طبعاً عشان احنا بنوبانيز بنحبلكم الخير جبنالكم أماكنهم.. قال عأساس حتفرق يعني، مهو وين ما رحتوا حتلاقوا كاميرا، شوي وحيحطوا كاميرا جوة الدار عشان لو واحد مهور بين المطبخ وغرفة النوم يلبس مخالفة! المهم هيهم:

1- شارع سحاب الستين عند إشارة سوق الخضار المركزي.

2- شارع الحرية قبال مسجد الحق

3- شارع الملك عبدالله الثاني كإنك رايح على دوار الشعب

4- إشارة اللبن المسرب اللي بودي عمادبا

5- شارع الملكة زين عند تقاطع النهضة

6-إشارة عبدالله غوشة كإنك رايح عمجمه جبر

7- شارع مادبا قبال أبو زغلة 

8- شارع الوقار من دوار السوق المركزي كإنك رايح على إشارة خريبة السوق

9- تقاطع شارع الملك عبدالله الثاني مع طريق المطار

10- شارع الأيوبيين للي جاي من شارع سحاب الستين 

11- شارع الأيوبيين بعد دوار مرسيدس بإتجاه الصوامع

12-شارع عرار من عند البنك العربي كإنك رايح على اشارات وادي صقرة

13- شارع الملكة زين الشرف كإنك رايح على دير غبار قبل جامع إسلام توغوط 

14- شارع المدينة المنورة عند نفق صهيب  

15- إشارة القيسية كإنك رايح على رأس العين

وقريباً على كل تقاطع ومدخل نفق وجسر وأي شارع عموماً..

قولوا جميد!