نوبانيز - جامعة البلقاء التطبيقية

15-01-2019

وصلنا أنه طلاب جامعة البلقاء التطبقية، معصبين ومعتصمين، والامور بينهم وبين رئاستهم مش ماشية، وحالفين يمين ما يروحو إلا لما الرئاسة تتراجع عن قرارها الأخير.

جامعة البلقاء كانت من فترة قررت تغير نظام علاماتها وتعتمد منحنى العلامات المحوسب، يعني بدل ما تكون علامات، تصير أحرف وكل حرف بمثل معدل معين، وبدل ما يحسب العلاماتا لدكتور يحسبها الكمبيوتر، شغلة عويصة الله وكيلكو، وما بتنفهم كيف بتنحسب.

المهم الطلاب ما عجبتهم القصة واعلنوا مواقفهم بشكل علني أنه ما بدهم هالنظام، الجامعة تقوللهم يهديكو يرضيكو تعالو نقعد سوا ونتفاهم، الطلاب يقعدو والجامعة ما ترضى تغير رأيها، الجامعة تقوللهم يهديكو يرضيكو تعالو نحسبها بالورقة والقلم ونشوف اي نظام أحسن والطلاب يقوللوهم احنا عارفين مصلحتنا وحاسبينها.

وهسّع الطلاب واقفة قدام الرئاسة معتصمة اعتصام مفتوح وقاعدين لرئاسة الجامعة مثل الرصد لحتى تتراجع عن قرارها.

والمشكلة أنه وحسب أقوال طلاب الجامعة أنه مشاكلهم أكثر من هيك بكثير بالجامعة بس هالمرة طفّح الكيل لأنه إجى الدق بعلاماتهم اللي بشقوا عشان يجيبوها 

عويصة: قصة ما بتقدر تفهمها لا ان شرحوها ولا ان ما شرحوها

 

 

بالصور: طلاب جامعة البلقاء معتصمين!