أَبو عَقْلِينْ

مثل ما إنتي عارفة يا أم عقلين بكرا جاهة شفيك إبن أبو شفيك، وأبو شفيك حلف مية يمين إلا أكون أنا المتحدث الرسمي بإسم الجاهة ، لإنك عارفة أنا خبير إستراتيجي بالتفاوض بالجاهات ،
على شان هيك  _الله يرضى عليكي _ جهزيلي طقم يكون هيبة يليق بجوزك ووضعه بين الناس .
حاضر يا أبو عقلين  ، شو رأيك بالثوب البني مع الجاكيت السكني ؟؟؟
الجاكيت السكني على شان جاهة شفيك؟
أي والله يا أم عقلين صاير لعقلك إشي ، أو إنك نسيتي قصته
هذا الجاكيت _ مثل ما إنتي عارفة يا أم عقلين _ ما بنلبس الا على مناسبات كبيرة جهزيلي الجاكيت البني بداله.
حاضر يا أبو عقلين ، بس مش عارفة مين اللي صاير لعقله إشي  ؛أنا ولا صاحبك أبو شفيك إللي مخليك بمقدمة الجاهة .
شو بتحكي مش سامعك ؟
لا بس بسأل هو أبو شفيك كان معك بجاهة إبنك يوم ما طلبت إله العروس ؟؟
لا ماكان معي كان عنده قطف زيتون بمزرعته ،
وبعدين شو كان مالها جاهة ابنك ؟؟ كانت جاهة ينحكى فيها ،،
اه والله بنحكى فيها ، الولد من ست سنين وهو بدبي مش قادر يرجع ، حتى زيارة من ورا الشيكات والكمبيالات اللي وقعهم على حاله بسبب الطلبات اللي طلبوها اهل العروس ، واللي قاهرني أكثر انه كل طلب يطلبوه انت تزيد عليه وتقول هذا من عندي،
لحد ماخربت بيت الولد .
يعني كنتي بدك اياني أبين صغير قدامهم؛ وأنا ابو عقلين على سن ورمح.....
وبعدين ابنك اللي اختار جماعة طماعين ؛ مش أنا اللي ضربته على ايده وقلت اله بدك تتجوز هذي البنت، وهم كانوا حابين يعجزوني بطلباتهم بس أنا كنت اللهم بالمرصاد.
طلبوا مهر 6000 دينار قلت ومن عندي كمان 3000 دينار،
طلبوا ذهب ب 4000 دينار واعطيتهم من عندي كمان 1000 دينار ،
طلبوا حفلة بفندق 5 نجوم وقلت من عندي كمان بوفيه مفتوح ،
ما أعطيتهم فرصة يتنفسوا  ؛ انتي مفكرتيني قليل بالمنطقة،
اي اللي مابصير عزا او عرس أو خطبة أو جاهة إلا وأكون أول الموجودين .....
اي ماإلك عليا ،يمين هذاك اليوم اتصل فيا ماغيروا _إعرفتيه _طلب مني أحضر جاهة إبن أخوه، بس أنا رفضت كنت معزوم عند فرج الله وماحبيت أكسر خاطره.
جيبيلي هالتلفون أشوف مين برن عليا..
هاذا ابو شفيك يا أبوعقلين ؛
هاتي أشوف شوبده.
اهلين أبو شفيك اه اه شو صار اه؟؟ لاحول ولا قوة الا بالله ،
خير شو صاير يا زلمة خوفتني..
لا بس أبو شفيك أجل جاهة ابنه ، بقول في قرابة الهم مات ولازم يسافر يحضر عزاه.
والله يا ابو عقلين الله بحبو لشفيك اللي نجاه من جاهتك .......