أَبو عَقْلِينْ

07-01-2020

يا مراحب يامراحب هلا بالغانمين هلا هلا بأبو فرج ومراحب بأبو شفيك ونوارتنا أبو اسحق زارتنا البركة والله
 أم عقلين حبايب قلبي عندي جهزيلنا أبريق شاي مرتب مع كرينيا  وبالنسبة للغدا بنشوف بعد الشاي شو بصير الله يسترنا 
أبو فرج : اسمح اللي ياابو عقلين احكي عني وعن الموجودين في شوية طلبات بنتمنى منك تمشيلنا اياها كونك كبير الحارة وكبير بمعارفك بكل الوزارات
أبو عقلين : والله يا أبو فرج أبشر باللي جيت فيه وان شاء الله اني مارح قصر معك "عندي"
أبو فرج : نبدا بأخونا أبو اسحق بالنسبة لأبو اسحق موضوعه كثير صغير جايب بضاعة من الصين والجمارك حجزت على الحاوية قال شو البضاعة مش مطابقة للمواصفات والمقاييس فيها مواد مسرطنة  وبدهم يرجعوها للمصدر وانت سيد العارفين  ابو اسحق حاط دم قلبه فيها واكيد انت مابترضى اله الخسارة والله العالم كيف دبر مصاري البضاعة باع ذهبات ام اسحق ورهن بيته للبنك واخذ شوية مصاري من خالته رضوة بدها تطلع تحج بيهن  
أبو عقلين : "عندي" أعتبر البضاعة صارت بمستودعه 
أبو فرج : وبالنسبة لأبو شفيك قصته الحزينة انه الضريبة حاجزة عليه قال على شان ما بصدر فواتير ضريبية بالمبيعات وقدرت عليه حركة 53 ألف ليرة بس هو بيني وبينك مبيعاته منيحة ومعارضه بسم الله ما بتوقف بيع بس بدنا همتك معانا نخفف المبلغ 
أبو عقلين : "عندي" أعتبر المبلغ انشطب عنه ونفك الحجز اللي عليه
أبو فرج : أنا قصتي يا أبو عقلين مع شركة الكهربا متهميني اني سارق من العامود كهربا للعمارة والمشغل اللي عندي وبدهم يخربوا بيتي مقدرين عليا كهربا فوق العشرين ألف وانا يادوب العمارة مع المشغل فاتورتي بتطلع 13 ليرة من وين بجيبوا الارقام مابعرف
أبو عقلين : "عندي" أعتبر موضوعك خالص ولعيونك عامود ضغط عالي يركب قدام بيتك على شان تسحب منه براحتك اذا احتجت يوم من الايام 3 فاز اكون متوفر
أم عقلين : أبو عقلين الشاي جاهز تعال خذه وقلي كيف بدك تحل كل هالمشاكل وانت أبنك ماقدرت تجيب اله قبول بالمدرسة اللي جنب دارنا ونازل تقول للجماعة "عندي وعندي"
أبو عقلين : أنا بقول الهم "عندي" وما وعدتهم أحل أشي وشوفي كل أربع سنين كم واحد بزورنا وبس نحكي اله عن مشاكلنا بحكيلنا عندي  وبس يوصل المجلس ما بنحل أشي ولا حتى بنشوفه وقفت عليا أنا  


أبو عقلين عندي