أَبو عَقْلِينْ
13-01-2020
أم عقلين يلا حسب الميزانية للشهر الحالي لازم نتسوق مونة الشهر بمبلغ 57 ليرة ونص ومابدنا تزيد المشتريات شلن واحد وكل اشي محسوب بكرا الصبح بس تصحي من النوم بتطلعي تتسوقي وتعملي شوبنج ويجعل لاحدا حوش مصاري تعالي احكيلك النصائح تاعت كل شهر بعرفك لازم أذكرك فيها بتنسي لأنك من مشاغلك على أساس رئيسة وزرا انتي
أول نصيحة بتكتبي اللي بدك تشتريه على ورقة وحسك عينك أشوف أي غرض مش موجود على القائمة بتكوني انتي هيك ساهمتي بعجز الميزانية عندي للشهر الجاي
ثاني نصيحة الأسعار عارفيتها كويس وأي زيادة بالسعر لاتشتري بكون جشع من التجار لان الحكومة على ذمتها قالت مافي رفع أسعار أي زيادة بالسعر بتدفعيها بتكوني انتي هيك ساهمتي بعجز الميزانية عندي للشهر الجاي
ثالث نصيحة خذي مصاري عالقد معك بعرفك اذا شفتي اشي بالسوق وعجبك بتتناوليه بتكوني انتي هيك ساهمتي بعجز الميزانية عندي للشهر الجاي
رابع نصيحة بتروحي عالسوق الصبح وماتروحي وانتي زهقانة أو تعبانة بدك تعرفي تلفي السوق مرتين ثلاث على شان تختاري أحسن سعر واي زيادة على الأسعار بتكوني انتي هيك ساهمتي بعجز الميزانية عندي للشهر الجاي
خامس نصيحة ماتشتري من أول محل بتفوتي عليه هيك بتضيعي العروض اللي بالمحلات الثانية وبتزيدي الكلف عليا و بتكوني انتي هيك ساهمتي بعجز الميزانية عندي للشهر الجاي
سادس نصيحة بتعمليلي مقارنة للأسعار بكل المحلات مع تقرير مفصل عن الجودة والنظافة والخدمة وبتختاري الأوفر لأنك عارفة أنه اي زيادة بالسعر بتكوني انتي هيك ساهمتي بعجز الميزانية عندي للشهر الجاي
سابع نصيحة بتشتري من العروض ولاتحكيلي بنستنى موسم التخفيضات لانك عارفة برفعوا السعر على شان بس يعملوا التخفيضات ترجع لسعرها الأصلي وانتي عارفة انه اي زيادة بالسعر بتكوني انتي هيك ساهمتي بعجز الميزانية عندي للشهر الجاي
ثامن نصيحة أنتبهي لتاريخ الصلاحية لانه اذا بخرب اللي بنشتريه بنصير بدنا بداله وانتي عارفة اي زيادة بالمشتريات بتكوني انتي هيك ساهمتي بعجز الميزانية عندي للشهر الجاي
تاسع نصيحة قسم اللحوم لا تدخليه وانتي بتتسوقي لأنك عارفة انه أختصاصي و أي اشي بتشتريه زيادة بتكوني انتي هيك ساهمتي بعجز الميزانية عندي للشهر الجاي
عاشر نصيحة بتروحي على السوق وانتي ماكلة وشبعانة بلاش تصيري تشتهي كل أشي بتشوفيه بتذكري السنة الماضية كيس الزنجر اللي أشتريتيه بعدنا الشهر الماضي مخلصين من عجزه وانسيت اذكرك اي اشي زيادة بتشتريه بتكوني انتي هيك ساهمتي بعجز الميزانية عندي للشهر الجاي
ولاتنسي تستمتعي بالتسوق ولاتحرمي حالك من رياضة المشي بالسوق على شان تحافظي على رشاقتك شو مالك ساكتة بحكي معك يا حرمة هذه طلعت نايمة وانا اللي سنة بحكي مع حاللي أم عقلين نمتي ولا عملتي حالك نايمة على شان ما تطفي الضو والله نايمة عنجد بعين الله بكرا بنعيد النصائح الها
