أَبو عَقْلِينْ

أم عقلين : أي شومالك يا زلمة من ساعة ماطلع ترامب على التلفزيون وانت وجهك ما بتفسر قالب مية وخمسين لون تقول دافن واحد من ولادك أي شو قال أحكيلي وفهمني صفقة القرن هذه.
أبو عقلين : أفهمك ايش ولا ايش انتي عارفة شو صار يا أم عقلين بس يلا أمري لله  بفهمك اياها أسمعي
بتعرفي انها جارتك أم عارف لا بتطيقك ولا انت بتطيقيها وطول نهارك مطاوشة معاها ومناوشات وصوتكم طالع لأخر الحارة مزبوط لاتجاوبي مزبوط
تخيلي تكوني طابخة سدر منسف بجميد كركي ولحمة بلدية وحاطة راس الخاروف عالسدر والسمنة البلدية ريحتها مفحفحة وراشة عالوجه صنوبر ومشربيته باللبن وقاعد يشرشر منه شرشرة  ومبسوطة عليه
وفجأة يجي المختار أبوعزمي ويقول هذه المنسف رح نعطيه لأم عارف عدوتك وانتي نحطلك منه معلقة بصحن فنجان القهوة ويحكيلك هذه حصتك بترضي بهذا الحكي ؟ في عقل بتقبله ؟ جاوبيني
أم عقلين : أي والله لأطلع بروحه وبروحها الحق حق أصير ضيفة في بيتي وعلى سفرتي والطبيخ طبيخي وانا اللي تعبت فيه وتيجي هي عالبارد المستريح تتسممه وبعدين مين مفكر حاله هذا ابو عزمي يعطي طبيخي لأم عارف ولا على شان فاتح سوبر ماركت ومعه شوية مصاري وببيع الناس وبقييد على الدفتر يتحكم فينا والله ماتفشر عينه وعينها هالخايسسين
أبو عقلين : عرفتي شو قاهرني وقالب سحنتي ولا أشرحلك كمان ولا أقولك استنيني يوم الجمعة الساعة 9:00  المسا على قناة رؤيا اعتبار من تاريخ31-01-2020 على شان تفهمي أكثر بهذا الموضوع وغير مواضيع مع برنامج نوبانيز شو ومراسلكم أبوعقلين