أَبو شَفييِّك

10-10-2019

بقت الناس زمان في القرية  بتشتري من الدكان عالدين، والسداد عالموسم يعني زي هسع بنتداين لاخر الشهر أو للراتب، المهم بقى الواحد يروح بقول لصاحب الدكان وبقول مثلا بدي رطل سكر، فصاحب الدكان بقوله نقدي والا دين ؟ فبجاوبه يا زلمة  (إذا دين حط رطلين). وصاحب الدكان كل ما تشتري شغلة بقولك يا زلمة (مهو دين خذ رطلين) يعني ما دام الواحد ما بده يدفع نقدي خلينا نزود هالكمية، ويعيش ويبعزق، مهو دين عادي.

بس مكناش نحسب حساب شو رح يصير عالموسم، رح نقدر نسدد والا لأ، وخليها ع ربك، وعالموسم اذا ما قدرنا نسدد بنأجل للموسم اللي بعده وبتتراكم الديون، وكثير من الناس اضطر يبيع أرضه عشان يسدد ديناته  ويضطر يشتغل عند الناس ،اللي كمان بتأجل اجرته عالموسم ويظل بهالدوامة ،لحد ما يهده الدين أو ينحبس .

حكومة (اذا دين خذ رطلين ) كل ما يصحلها قرض ، بتجيبلنا أياه ،وابصر وين بتروح مصاريه،وما في ترتيب أولويات بالانفاق ،ولا الية واضحة للسداد ، لحد ما زادت مديونيتها بعهد هذي الحكومة لحالها مليار ونص ،ووصل مجموع الدين لحولي 40 مليار ، وكله ماشي ع مبدأ اذا دين خذ رطلين،ويا خوفي انهم يوصلونا لمرحلة الكرفتة.

الدين قاعد يأثر على استقلالية قرارك ، ويأثر على قدرة البلد عالتنمية ، وبتصير انت تشتغل ليل نهار وبتفرض ضرايب على الناس وبتحط ضريبة ع كل شي ،وعالفاضي لأنه كل ناتجك المحلي ما بسكر فوائد الديون .

 

إذا دين حط رطلين