أَبو شَفييِّك

يا أخي شعبنا عجيب غريب، وبيتفاعل مع أي قضية عربية بسرعة وتلقاه مهتم فيها أكثر من قضاياه المحلية، يعني وقت انتخابات الأشقاء في تونس، تحس انه هالانتخابات في الأردن مش في تونس، وتشوف مواقع التواصل عندنا بلشانة وبتحشد وحالتها حالة، ولما تكون القصة في مصر، تحس إنه الأردن قلبت صعايدة وخلافات وآراء وسوالف، وحتى لما صارت مظاهرات لبنان الأخيرة اللي لسة شغالة، ما تقول شعبنا إلا قاعد في وسط بيروت، ومهتم أكثر من اللبنانية نفسهم.

المشكلة إنه لما يصير عندنا قضية، يمكن تشوف الشعب يحكي بس ما بتشوف تحركات عأرض الواقع، يعني بشجعوا المظاهرات في لبنان عشان قضايا الشعب اللبناني، بس ما بشجعها هون عشان قضاياه المحلية، بشجعوا الإنتخابات الديمقراطية في تونس، بس هون بروح ينتخب على العشيرة، أو عالمصلحة، بشوف القمع في مصر للتظاهرات ويحكي عنها قمع، بس هون بشوفه انه أمن وأمان.

إحنا بنحب عروبة الشعب الأردني وإهتمامه بقضايا إخوانا العرب، بس كمان البلد إلها حق في مشاركتك في همومها وقضاياها، وهلا عمي ..