أَبو شَفييِّك

رئيس الوزراء عمر الرزاز مثله مثل غيره ،وعد انه ينهي ملفات الهيئات المستقلة اللي قاعد تستنزف بالموازنة واللي عاملة قلق للشعب الأردني ومجننتهم ،لأنه رواتب موظفينها ومسؤولينها خيالية ،وللان ولا قدر أي رئيس ينهي ملفاتها ،وعمو ابو الرزاز وعدنا ينهيها وللان مافي شي .

يا جماعة الخير الهيئات المستقلة مش عارفين من وين جابولنا اياها وبتحسها حكومة غير الحكومة اللي عندنا ، يعني قال عندنا وزارة نقل وعنا هيئة تنظيم قطاع النقل ،وعندنا وزارة اتصالات وهيئة تنظيم قطاع الإتصالات ،وعندنا وزارة سياحة وهيئة تنظيم قطاع السياحة وعندنا وزارة طاقة وهينة تنظيم قطاع الطاقة ، يعني كل هيئة تشتفل شغل الوزارة نفسه ليش عاملينها وليش ما تدمجوها مع وزارتها .

خلي عمكم أبو شفيق يحكيلكم شو الفرق بينهم ، الفرق انه الموظف في الوزارة بكون خاضع لديوان الخدمة المدنية وبيستنى عالدور التوظيف ،وبيقبض من معاشات الحكومة اللي يدوب بتسلك للواحد أموره ، أما موظف الهيئة بيستنى دوره عالواسطة وبيقبض ضعف راتب موظف الوزارة ، يعني بالعربي الفصيح طبقية في التوظيف ، يعني هيئات ما الها داعي وبنفس الوقت رواتب مرتفعة ومحصصات بتوكل من الموازنة .