فرَج اللّه

بعبش بالجيبة بعبش..طيبين وناعمين..هرايس هرايس..
وبعدين معهم بعدين، كل هالشباب المتخرجين قاعدين لا شغلة ولا مشغلة، وبتعرفوني أنا معارفي كثيرة فكلهم بييجوا لعندي يشكولي ويحكولي دبرلنا شغل يا عمي أبو فرج، هاظا متخرج هندسة وهظاك متخرج محاسبة والثالث تمويل، أنا بقول للشباب القاعدين تعال أعلمك صنعة الهريسة عشان أصير مساهم في خلق فرص العمل، بس شباب هالأيام ما بدها هاي الصنعة، مع إنها بتكسب ذهب، هات الجريدة يا أبو علي خلينا نشوف هالحكومة لوين بدها توصل..
الله أكبر تعال شوف يا أبو علي، هاي وزير العمل بقول خلال هاي السنة صار مشغل ٣٠,٠٠٠، طيب والشباب هدول شو قصتهم، استنى خلينا نكمل الخبر، هيو بقول: "الوزارة لا تدعي بطولات حول تحقيق هذه الأرقام، إذ أن حجم البطالة أكبر بكثير من الوظائف التي تم توفيرها"، أيوا الاعتراف بالذنب فضيلة والله عجبني كلامه..
أَيْ نقابة المهندسين بتحكي إنه ٢٠,٠٠٠ مهندس لم يحصلوا على فرصة تدريب نقابة، مش بس ما حصلوا على شغل، يعني تدريب النقابة كل راتبه ٢٢٠ ليرة يا دوب يكفي هالشباب مواصلات ما صحلهم، ولاد جيراننا وقرايبنا المتخرجين لسا قاعدين وأنا دايما ببشرهم إنه لا تخافوا راح تلاقوا شغل، هاي الحكومة والله بلشت تشتغل عشان تزيد فرص الشباب، وبقولوا إنهم بدهم يصيروا يوفقوا بين مخرجات التعليم وحاجة السوق، بس أنا بحكيلهم هالحكي عشان أصبرهم ولا أنا عارف البير وغطاه..
انتو عارفيني يا عالم أنا ما بخفى علي خبر، حتى باجتماع وزير التخطيط ووزير الشؤون الاقتصادية مع البنك الدولي اليوم قال: "نسبة البطالة في هذه المنطقة وبالأخص بين فئة الشباب بقيت الأعلى في العالم خلال آخر عقدين بنسبة ٢٦٪"
بعدين معهم بعدين، يا عمي سهلوا على هالمحلات والبياعين خليهم يعرفوا يشتغلوا، ويشغلولكم البلد، وانتو وعدتونا إنه ما راح تزيدوا علينا ضرايب جديدة، بس أنا بقلكم لازم تخففوا الضرايب، وتبطلوا تعتمدوا على الديون والمساعدات، سهلوا الشغل بالبلد بتصير البلد نفسها تطلعلكم المصاري، إذا الناس لقت شغل وصحاب المحلات معهم يدفعوله رواتب بصير قادر يشتري هريسة من عندي وبيشتريله معها قنينة عصير وبتبضع للبيت بصير السوق يشتغل يا عمي..
خلص أنا إذا بدي أحكي بخلصش هلأ، تفضل يا عمي أحطلك إوقية؟