فرَج اللّه

هرآيس هرآيس ازكى هرايسات من عند فرج الله قرب وذوق هالشقفة وذوق طعمها مرجوعك لهالصينية.
بعبش بالجيبة بعبش ودير بالك تتخربط بين الوتكة والتعريفة مثل ما انا متخربط من قصص الكورونا واللي خلتنا ننسى قصص فواتير الكهربا وخلتنا ننسى قصص الترهل الإداري وقصص المساكين اللي بدون شغل وقصص الباص السريع.
يعني يكون الواحد منا حاب يسولف عن هالقصص يمرق واحد لابس كمامة يخلي عقل الواحد يودي ويجيب ويبطل يعرف وين يبيع الهرايسات ولا عن شو يحكي ولا عن ايش بده يحلل.
وما رح نخلص من الكورونا الا والانتخابات جاية ومن خربطيطة لخربطيطة يعني الواحد ممكن يوصل الانتخابات ويبطل يعرف يروح على مقر انتخاب يسمع فيه كم جمله وكم وعد من النواب من ورا هالكورونا.
بعبش بالجيبة بعبش قرب وذوق هرايساتي معمول عليهن حجر صحي وداخلات فحص مخبري واصلا السميدة واللوز شغلات طاردة للفايروسات عليم الله لو دبق فايروس بالقطرات ما يطلع منه إلا وهو طالعة روحة.