نوبانيز- روسيا

14-05-2019

سبحان الله يا أخي، يعني ترامب قاعد بدور على عداوة العالم دوارة، مش تارك حد بالعالم من شره من أول الناس اللي معروف إنهم أعداء أمريكا لحد أقرب حلفائها أبو إيفانكا مش راحمهم يا عقوبات يا تهديدات يا بيانات ضدهم، بس لما يوصل عند روسيا بيقلب ترامب الحساس اللي عيونه قلوب حب وحامل دبدوب ووردة حمرا تقول قاعد بحاول يزبط بنت الجيران.

واستكمالاً لسلسلة الغزل بين أمريكا وروسيا طلع وزراء الخارجية تاعونهم بتصريحات بتحس وإنت بتقرأها كإنه تامر حسني بيغني وراهم "ناسيني ليه" مايك بومبيو وزير الخارجية الأمريكي طلع بتصريح بيحكي فيه "أنا اليوم موجود في روسيا لأن الرئيس ترامب ملتزم بتحسين العلاقات مع روسيا وايجاد سبل للتعاون" فرد عليه سيرجي لافروف وعيونه بتلمع وخدوده احمرت "أتوقع حان الوقت لفتح صفحة جديدة" وبعدها مسكوا إيدين بعض وطلعوا من المؤتمر الصحفي وركضوا على شط البحر الأسود وطلعلهم بوتين على صخرة وهو بيعزف على جيتار..

طبعاً اللي بالآخر ما صار، بس يعني لو شدينا عليهم شوي كان ممكن يصير.. والله أعلم يعني شو الغزل اللي حيطلع لما بومبيو يقابل بوتين اليوم، مهو كمان يعني العلاقة بينهم مش كثير ماشية صح، برضه روسيا إلها حركات مش حلوة، لساتها مصاحبة إيران وهي عارفة إنه أمريكا بتحبهاش، وكمان تاركة أسلحتها تبرطع بالعالم يمين وشمال وأمريكا بتحبش الكركبة الا اللي هي بتعملها! بس أكيد أكيد.. الحب حيكون أقوى وحينتصر بالآخر، وإحنا عاد إلنا الله!

غزل روسي امريكي!