نوبانيز- مصر

08-07-2019

بعد الدراما الرمضانية اللي صارت مع منتخب مصر من أول ما بلشت بطولة كأس الأمم الأفريقية، استبعاد عمرو وردة ورجعته والمباريات اللي بتنلعب بدون تكتيك لحد طلوعهم على إيد جنوب أفريقيا، الكل كانت عينه على أبو صلاح فخر العرب والقائد الفعلي للمنتخب المصري مع إنه مش الكابتن، وبعد الاقصاء الكل كان بستنى يسمع منه عشان يعرف شو اللي قاعد بصير..

محمد صلاح كتب تويتة إمبارح بيحكي فيها "حزين جدًا لخروجنا المبكر من كأس الأمم الإفريقية.. كان نفسنا نكمل المشوار سوا للآخر ونجيب البطولة لجماهيرنا الوفية، اللي لازم أشكرها شكر كبير على الدعم المعتاد منهم وإن شاء الله نتعلم من الأخطاء اللي وقعنا فيها.والتوفيق للمنتخب فيما هو قادم.." طبعاً التويتة متوقعة وعادية بهيك ظروف.. بس في كثير ناس مسكت بجملة "بالتوفيق للمنتخب فيما هو قادم" وحستها تلميح من صلاح إنه بدوش يلعب للمنتخب.

أبو صلاح.. الإعتزال الدولي بعد الخسارة مع المنتخب هاي تخصص ميسي الله يسعدك، بدناش نخربط الطبخة وتصير موضة، العب زي العالم والناس وتتدخلش بقصص تقلل قيمتك قدام جمهورك وإنت حتكون تمام!

 

معقول أبو صلاح يعمل زي ميسي؟