نوبانيز- انجلترا

25-07-2019

شوفوا الناس المسعدة لما يضرب معها الحظ، وتيجيها الفلوس من حيث لا تحتسب، مش حسد ولا ضيقة عين، بس شوف عمك محمد صلاح لاعب ليفربول الإنجليزي، مش بس سعره عالميا وراتبه السنوي بالملايين، كمان صفحته على انستغرام قاعدة بتجيبلوا دخل كبير، بفضل الـ 30 مليون متابع اللي معشعشين ببروفايله، غير إنه ترتيبه هو 26 بين اكثر شخصيات انستغرام تأثيرا!

عمك ابو صلاح لما بده ينشر أي صورة دعائية على حسابه، بياخذ عليها دخل 165 الف دولار، اللهم لا حسد، بس لسة في قبله لاعبين بتكلف الدعاية على صفحاتهم اضعاف ابو صلاح، مثل البرتغالي كريستيانو رونالدو واللي بوخذ على المنشور على حسابه مبلغ 975 ألف و البرازيلي نيمار دا سيلفا، لاعب باريس سان جرمان، اللي بوخذ 722 ألف دولار عن كل صورة دعائية على حسابه، بعديه  نجم برشلونة ليونيل ميسي، اللي بتقاضى نحو 648 ألف دولار مقابل كل صورة على "إنستغرام".

وفي  شخصية عربية كمان، وهي خبيرة التجميل هدى قطان، اللي حلت بالمركز 31، ويكلف المنشور في حسابها أكثر من 91 ألف دولار، هاي الناس المسعدة ولا بلاش.

حبايبنا طلاب التوجيهي في حال ما نجحتوا وأهاليكم عايروكم بقعدكتم على الانترنت أعطوهم هاي المعلومات واحكولهم بدنا نصير مشاهير، كيفنا معكم؟

قديش بتكلف الدعاية على صفحة صلاح؟؟