نوبانيز - الأردن

24-10-2019

جلالة الملك قال: "آن الأوان لاتخاذ قرارات وإجراءات واضحة تحفز الاقتصاد الوطني وتلامس حاجات المواطنين المعيشية وتخفف البطالة"..
والرزاز حاطط بباله محاور رئيسية، قال: "الإجراءات والقرارات التي ستتخذها الحكومة تقع ضمن أربعة محاور رئيسية هي: زيادة الأجور والرواتب، تنشيط الاقتصاد وتحفيز الاستثمار، تحسين جودة الخدمات المقدمة للمواطنين، والإصلاح الإداري والمالية العامة"
خلينا نيجي عليهم وحدة وحدة، زيادة الأجور والرواتب بلشنا نشوفه صراحة، أول اشي زادوا المعلمين، والرزاز حكى إنه راح يزيد رواتب العاملين بالقطاع العام أول السنة الجاي، وفي موافقة على منح زيادة لموظفين البلديات، واستمرار هاي الزيادات راح يعكس زيادة في القوة الشرائية بالسوق يعني بتحسن الاقتصاد..
تنشيط الاقتصاد وتحفيز الاستثمار، قلبنا معكم لتطبيق هاد الكلام، اسحبوا رجل المستثمر بس المشكلة الشعب شايف غير هيك، شايفين إنه المستثمرين بيهربوا لدول تانية من كتر الضرائب اللي بتحطوها عليهم، هاد غير الشروط التعجيزية لمنح المستثمر الجنسية..
تحسين جودة الخدمات المقدمة للمواطنين، عشان الإنصاف في محاولات للتحسين، زي مشروع الباص السريع اللي يا رب نركبه قبل ما نموت، والطريق الصحراوي اللي الحوادث زايدة عليه بشكل مش طبيعي بس برضه في محاولات، وبنتأمل إنه نشوف أكتر وأكتر..
الإصلاح الإداري والمالية العامة، هلأ إصلاح إداري يعني المفروض روس كتيرة تطير من مكانها لأنه انتو عارفين البير وغطاه، وهلأ صار عنا هيئة مكافحة الفساد المفروض يصير في إصلاح إداري، وبالنسبة للمالية العامة، وزارة المالية هلأ قاعدة بتلطم، لأنه قاعدة بتحسب ميزانية السنة الجاي، وفي ظل زيادات الرواتب اللي صارت مش عارفين وين يروحوا بحالهم، من وين بدهم يجيبوا مصاري الميزاني، الله يستر من قروض السنة الجاي..

جرعة أمل من الرزاز