أَبو عَقْلِينْ

قاعد بأمان الله بالحوش بحكي مع حالي وبقول والله من زمان ما قعدنا أنا وأم عقلين مع بعض نشرب كاستين شاي، قمت ناديت عليها "يا ام عقلين إعملي كاستين شاي وجيبيهم عالحوش"، راحت حكت اللي ليش مين أجا عندك؟ حرام مش متعودة على هذا الحكي 

حكيت الها مافي حدا بس حاب نشربهم انا وانتي  ونتذكر الايام الحلوة الخوالي مع بعض والله وأجت ام عقلين وفي بايدها كاستين الشاي وبدت تحكيلي اي خوالي واي حلوة 

وانت من ثاني يوم عرسنا وانت بتطلع عالشغل بتروح بتتغدى  وبتنام وبس تصحى بتروح عند ابو عدنان الخضرجي بتقعد عنده للمسا بتروح بتتعشى وبتنام، أي يا زلمه  اللي عمرك ماسمعتني كلمه حلوة  ولاروحت من شغلك وشفتني تعبانه وحكيتلي يعطيكي العافية .. عمرك ما اخذتني على مطعم تغديني لو حمص وفلافل أنا قابله، عمرك ما روحت جايب اللي ثوب البسه بلاش ثوب  يانس صلاة البسه .. اي حتى بعيد زواجنا بتكون قاعد مثل اللي دافن إمه!

وخلصت هالموشح وفاتت عالمطبخ تحرك الطبيخ اللي على الغاز..

وجعت راسي ملعونة الحرسي ونسيت انه طول عمري بركض ورا رغيف الخبز ومش ملحق بس أنا اللي بستاهل .. حدا بجيب الدب لكرمه