أَبو عَقْلِينْ

بعد كاستين الشاي اللي خبرتكم فيهم  مع ام عقلين، وبعد الموشح اللي سمعتني اياه، قعدت مع حالي وصفنت وقلت اي والله يا ابو عقلين انها ام عقلين معاها حق؛
اي شو فيها اذا دللتها، مهي بضل رفيقة عمرك، و تحملتك عالمرة؛ وعشان الحلال والحرام ما بعرف اذا كان في عالحلوة ماني متذكر. رحت مديت ايدي على جيبة الجكيت السكني، هاذ الجكيت السكني قصته طويلة ان شاء الله بحكيها الكم بعدين، وقلت خليني أعد هالقروشات، ولا في 17 ليرة و 85 قرش، قلت خير وبركة.
قمت ناديت على ام عقلين، وقلت الها جهزي حالك بدنا نطلع مشوار، ولا هي بعالي صوتها تصرخ وتقول امانة الله شو في؛ أمانة الله تحكيلي شو في، والله قلبني حاسني انها عمتي أم نزار توفت .
قمت صرخت عليها وحكيت الها ما في اشي بس حاب اطلع معك مشوار، أي معذورة بصراخها وخوفها عمري ماعملتها.
مابدنا طولة السيرة راحت غيرت أواعيها ولقيتها بتقلي يلا جهزت.
والله بنكزدر بالشوارع ولا كل اشي متغير، فتنا عمحل الحلويات قعدنا، ناديت عالجرسون بحكيله بدي صحنين كنافة وزيد القطرات نحلي ثمنا، قام قلي احنا عنا بس وافل، هزيت راسي مابدي اعمل حالي غشيم ومش عارفه للوافل، حكيتله هات صحنين وزيد القطرات؛ قام اعطاني نظرة وقلي قصدك الشوكولاته! حكيتله اه زلة لسان الله يلعنك يا أبليس.
جاب الوافل؛ اكلنا انا وام عقلين وحكينا اشوي وطلبت الفاتورة؛ ولا هي بتحكيلي شو رايك قبل ما نروح نروح نجيب جاجتين عشان غدا بكرا؟ لسة بدي ارد عليها ولا الفاتورة بوجهي 14 ليرة ،
هون وصل ضغطي للعالي وحكيتلها قومي نجيب عدس عشان غدا بكرا، بدك جاج لو تعرفي قديش ضايل بجيبتي، اخ شو بدي اعمل مهو الشهر اللي أوله وافل أخره عدس....