أَبو عَقْلِينْ

بعد ما أكلت وافل أنا وأم عقلين، ودفعت إللي فوقي وإللي تحتي، وبعديها قضينا الشهر نوكل عدس.
قلت بعقلي؛ أي شو بنقصك يا أبو عقلين إنك تصير صاحب مصلحة؛ وأسمك يلعلع بالشوارع، وما بتعرف يمكن تصير صاحب سلسة مطاعم أو قهاوي عالمية، ترى الله كريم ومافي اشي بعيد عن ربي.
وما كذبت خبر، وأرنلك تلفون على فرج الله؛ واحكيله أترك كل إشي بإيدك وتعالي جاي.
ومثل مانتوا عارفين فرج الله أقدم واحد ببيع هريسة بعمان؛ من 45 سنة وهريسته نفس الطعم ونفس الشكل ونفس السعر؛ وحتى نفس الزباين.
والله ربع ساعة ولا فرج الله بدق عالباب، فتحت الباب؛ السلام عليكم وعليكم السلام....
وانادي على أم عقلين وأقول الها ساوي شاي يا أم عقلين ، زارني الغالي صديق عمري وشريكي ان شاء الله....
فرج الله قلبه نقزه، بين عليه حس إني بدي إشي منه.
فش دقيقة ولا كاستين الشاي جايات، وبلشت احكي لفرج الله؛ بتعرف انه اللي ما بتطور بنقرض، وأنت الك 45 سنة بتبيع هريسة بنفس الوضع ونفس الشغل وماتغير عليك إشي، واحنا هسا بعصر العولمة والإنترنت والناس صار بدها إشي جديد تحلي ثمها فيه، والهريسة صارت موضة قديمة، وانه في أنواع جديدة نزلت عالسوق، وصرت أعد إله بأصناف إشي بعرفه وإشي مابعرفه؛ إشي تشيز كيك على وافل على كريب وهو يشرب شاي ويهز براسه، انا هون إطمنت إنه فاهم عليا، واكمل حكيي معاه واحكيله: انت يافرج الله لازم تقبل بالحقيقة المرة؛ إنها الهريسة طلعت من السوق .. وهو يشرب شاي ويهز براسه، وارجع احكيله خلص يافرج الله لازم تغير صنعتك؛ وتتنوع فيها على شان تقدر تنافس، أي عليم بالله ماضل زباين عندك غير أنا وأبو شفيق بكل عمان بنشتري منك ، الناس تطورت وأنت مكانك ماشي.
أنا بحكي معك مابدي إياك تطلع من السوق وينخرب بيتك وتموت من الجوع، شو رأيك أنا وياك نتشارك بعرباية وافل وكريب ؟؟؟ وان شاء الله شغلنا بكبر؛ وبعديها بنفتح محلات بكل الأردن والمهجر.
ولا فرج الله شارب آخر شفة بكاسة شاي، وقال إلي:
وإنت كمان الك 45 سنة وإنت نفس الإشي، ماتغيرت بشلن، وهيوتك عايش وما انقرضت،
ولا العولمة بس على الهرايس، عمي الرزق على الله،  افتح اللي طريق أروح أكمل شغلي ....وصار ينادي     " ناعمين وطيبين هرايس هرايس"
أي والله بعد هالكلمتين هذول، صفنت وقلت معاه حق فرج الله صرنا  2020 وأنا بعدني عايش 1970.. خلص لازم تتغير ياأبو عقلين ، ملعون هالحرسي فرج الله بدال ما أقلب راسه قام هو قلب راسي.....
قمت ناديت على أم عقلين، وقلت الها جهزيلي الجكيت السكني _وهذا الجكيت قصته طويلة بيجي وقت احكيها _ .

استنونا ..