أَبو عَقْلِينْ

أبو عقلين..
أي والله فرج الله معه حق ، أنا شو بعرفني بالوافل والحلو والقصص الفاضية هذه، خليني باللي بعرفه؛
وبما إنه احنا بموسم الزيت أروح اشتري اللي زيت.
"يا أم عقلين أنا رايح عالمعصرة أجيب زيت زيتون بلدي أصلي، مأنتي عارفة أنا بالزيت بحب أشوفه بينعصر قدامي، وبالمرة بلكي جبت زيتون على شان تعمليه النا، بس دقيهن منيح؛ مش مثل كل سنه
يكون دقهن تفعيص، بنطول حبة الزيتون بتكون مختفية ملامحها."
"مابدي إشي،  بس دير بالك يضحكوا عليك بالزيت، مثل كل سنة، أي من 25 سنة وأنا نفسي أكل زيت زيتون  نظيف، إِليّ دايما بتجيبه انت لا هو زيت زيتون نعرف ناكله، ولا زيت قلي نعرف نقلي فيه، أي لولا أخوي، الله يرضى عليه، ببعثلنا تنكتين من أرضه كل سنة؛ ولا كان من زمان إنسينا طعم الزيت."
"أخوكي ببعث زيت أحسن من الزيت إللي بجيبه؟! أي والله زيت السيارات أحسن من الزيت اللي بجيبه أخوكي!"
يلا اتكلنا على الله هيني طالع.
"بشوفك صرت جاي يا زلمة، ليش ما طولت؟"

"أي والله يأم عقلين لفيت على كل معاصر البلد، وبالآخر لقيتلك معصرة... أما شو زيت.. شو زيتون..
كل حبة انظف من الثانية، كل نقطة زيت بتنزل تقولي نقطة ذهب، اي كل اللي بالمعصرة طلبوا مني انقيلهم الزيتونات اللي بدهم يعصروهم، بس أنتي عارفة ما معي وقت؛ والناس كانوا كثار، على مين ولا مين بدي اللحق."
"المهم هي الزيتات صارو عندك، اعملي النا لقمة نتعشى عليها لحد ما أغير اواعيه، وديري بالك الجاكيت السكني بتعرفي قصته الطويلة، بترجعي تعلقيه منيح مثل ماكان، أنتي عارفة اللي من الصبح بلف بالمعاصر
على شان اجيب مونة السنة من الزيت."
"اتفضل يابو عقلين، هي العشا صار جاهز، مطرح مايسري يمري."
"اي ليش طعم البيض هيك ؟؟ تقولي عليه فلفل !! وقلاية البندورة، شو حاطة عليها طالع طعمها مر؟"
"ولا اشي يابوعقلين بس هذا الزيت اللي جبته انت، طلع مثل كل سنة مغشوش."
لا مش مغشوش، بس سايق البكم أنا كنت شاكك انه بدلهم بتنكاته، أي والله من نظرات عيونه مبين عليه سرسري_ملعون هالحرسي _ .
خلص بعينا الله اعملي عشا بس من زيتات أخوكي المرة هذي!
والزيت إللي جبته أنا؛ بكرا بنزل عالسوق وبشتري الك 120 كيلو بيتنجان وتوابعهم؛ من جوز قلب وفلفل وشطة وثومة، وأنتي عارفة بعديها شو رح تعملي بالزيتات مثل كل سنة......
الله يرحمك يابا كنت دايماً تحكي حكمتك
( غشني بالسعر ولا تغشني بالبضاعة )  بس اليوم أنا إنغشيت بالسعر وبالبضاعة......