أَبو عَقْلِينْ

أبو عقلين في اثنين شباب في سيارة ميتسوبيشي سلڤر؛ بدهم إياك......
هذول الجماعة ماغيرهم ؛ شو قلتيلهم؟ احكيلهم مش موجود؛ أو احكيلك احكيلهم اجاه عقد عمل بقطر؛ احكيلهم طلع هجرة على أمريكا ومابده يرجع!!
والله يا أم عقلين ماكنت متوقع انه رح يصير هيك ويكبر الموضوع، أنا قلت كلمتين فشة غل وخلص، بس أكيد هذا فرج الله طلع مخبر؛ ولا منين معه كل هالمصاري أبو الهرايس، وحكالهم شو حكيت عنهم يوم إرتفاع الأسعار وزيادة الضرايب اللي هدت حيلنا وخلتنا نسولف مع حالنا، أو يمكن حكالهم بس كنت معصب من المواصلات والتحويلات.
شو حكيت عن أمانة عمان _ بس كانت ساعة عصبية_ معقول بحاسبوني عليها ؟!
وبعدين يومها كنت معذور؛ قعدت ساعتين بالطريق من خلدا لدوار المدينة الطبية، أي والله حكيت مع حالي بالشوب، وهالشوفير اللي حاطط أغاني عراقية. 
أو خوف الله مبارح بس ناداني أشرب عنده شاي كان يسألني أسئلة غريبة؛ عن السائحة رقم مليون _هذه تاعت البترا  _وحسيت إنه بده يسحب مني حكي؛ بس قلت عشرة عمر وما بعملها... وأنا انفعلت وحكيت اللي بقلبي؛ معقول حكى لسفرتها شو حكيت ؟؟ اه والله معقول على شان طمعان يعطوه جنسية ويروح يبيع هرايس عندهم....
آه أنا عرفت هذا يوم ماكان عندي فحوصات، وأعطوني موعد بعد 3 شهور؛ وشافني وحكالي مالك معصب؟؟ ويومها لاخليت ولا بقيت؛ أكيد أكيد حكى لأبو مسعود _صاحبه الشوفير بوزارة الصحة _  وابو مسعود قال السولافة كلها لمديره، ومديره بلغ عني، بده يترفع عحسابي الله لايوفقه.
بس قبل مايوخذوني يا ام عقلين بدي اعترفلك أكم من إعتراف، إنتي بتعرفي إنه أنا اللي كسرت الساعة اللي كانت معلقة عالحيط، وأنا بغير توقيتها للصيفي وقعت من إيدي وانكسرت، وانتي ظليتك يومين زعلانة عليها، وفكرتي إنها وقعت من الهوا ، بس كمان انتي الحق عليكي ، ظليتك تنقي فوق راسي زبط توقيتها زبط توقيتها؛ وانتي عارفة انهم بعد 6 أشهر برجعوا التوقيت مثل ماكان، لو انك صبرتي ليرجع التوقيت ...كان ما انكسرت..  بس الله يهديكي، دايما مستعجلة، وبتحبي تخليني طالع نازل عالسلم أزبط فيها ،يلا المهم سلامتي .
وأه كمان الدبلة تاعتك اللي اشتريتها يوم عرسنا .....ما ضاعت، أنا  بعتها  بعد العرس بشهرين، وصرفت حقها مشاريب بالقهوة، بس كانت أيام طيش، وانتي ظليتك شاكة طول هالسنين بجارتك أم عاطف عالفاضي، بس بيني وبينك ام عاطف نكدية وعينها صايبة، الله يرحمك يا ابو عاطف كيف أخذتها.
وأخر إعتراف أمك_ الله يرحمها_ كان المنسف من تحت إيدها عقاب ومش زاكي؛ وعمري ماحبيته، ماكانت تعرف تطبخ، واللحمة دايما زنخة تطلع معاها، واللبن مفرفط ،وكنت بس نروح عندها أشرب دوا المعدة قبل الغدا.
ووصيتك الجكيت السكني؛ انتي عارفة غلاوته عندي.
شومالك ساكتة لهدرجة زعلانة؟؟؟!
لا والله يا أبو عقلين بس كنت بسمع باعترافاتك الخطيرة قبل ما أحكيلك إنهم هذول الشبين جايين يصلحوا الفلتر الخربان وماكنت عارفة إنك لهدرجة خواف،، إسمعي أنا مابخاف غير من الله اللي خلقني، بس حبيت أحكيلك كل إشي بصير معي على شان تكوني عارفة كل إشي عني، واطلعي احكيلهم بطلنا بدنا نصلح الفلتر، وساويلي كاسة شاي أبرد على قلبي...